كلي ملح وقبله!.. مجرد ثرثرة..

* تدرون وش أكثر شيء معجبني في نفسي، إني كلي ملح وقبله، وأحس إن فيني طخامة ووسامة ما هي في الشيخ العريفي بجلالة قدره ولا في مهند التركي “بزاتوا”، صحيح إن الملح يرفع الضغط، بس عادي ملحي ما هو أكثر من ملح ومغثة بعض قطاعتنا الحكومية الي تجيب الهم والغم وضيقة الصدر..

* هالملح الي فيني ما جاء من فراغ بل كانت صناعة متعوب عليها، فمنذ نعومة أظفاري يوم أنا لابس بدلة الشرطي في العيد وأنا أحس إني توم كروز عصري، حتى إني فكرت أكثر من مرة أروح هوليود، بس ما كنت فاضي..

* إلا على ذكر الهم والغم شفتوا الي تجي وقت السحور صدق إذا قالوا طلعت شياطين الإنس، ودي أصلح استفتاء أحط فيه ثلاث أسئلة، كم عمرك؟، متزوج؟، تتابع حليمة بولند؟!..

* محركات البحث تجيب للمدونة ناس تبحث عن “حليمة بالبنطلون”، مدري وش السر في بنطلونها، يمكن موضة جديدة وتبحث عنها بنت، ويمكن شيء ثاني ويبحث عنه ولد، لا شكل “حليمة بالبنطلون” أكله جديدة ما تحلى إلا في رمضان..

* مسلسل “أم الحالة” فكرته حلوه وطريقة عرضه أحلى بس المشكلة إن كل الشباب في المسلسل يركضون ورى الغزل..

* مسلسل “عوانس سيتي” شفت أول حلقة منه فقط، كانت كوميدية وحلوة بس ما قدرت أتابعه حاكم النشاط في رمضان أنتج أكثر من 60 مسلسل وش تبي تتابع منها، قلت لكم شياطين الإنس طالعة..

* مسلسل “باب الحارة” أعتقد فقد رونقه وبريقه، أغلب الأبطال الي شالوا المسلسل في أجزاءه الأولى كانت نهايتهم الموت باستثناء العقيد فقد اختفاء وراح وطي..

* يخلص الغاز في البيت وما تفطر أو تتسحر نعديها ونقول الفرن الكهربائي غالي ويصرف كهرباء كثير، إما إن يخلص الغاز وأنت تطبخ على الهواء مباشرة في القناة السعودية الأولى وما تدري وش تقول للمشاهدين وأنت شيف متمرس وتقدر تعرف إن أسطوانة الغاز تبي تنتهي من نارها، هنا نتأكد إنك معلم مطبق تحط أسطوانة الغاز في ماء على بالك محترف..

4 قراء تعجبهم التدوينة.

أعجبتني

غير معجب